Այսօր Երևանում մեծ ուսումնավարժություն է

Նոյեմբերի 30-ին ՀՀ արտակարգ իրավիճակների նախարարությունն ուժեղ երկրաշարժի թեմայով խոշոր հրամանատարաշտաբային ուսումնավարժություն է անցկացնում Երևանում։

Միջոցառմանը ներգրավված են ՀՀ պետական կառավարման մարմինների, ՀՀ արտակարգ իրավիճակների նախարարության բոլոր ստորաբաժանումների, Շիրակի մարզպետարանի, «Հարավկովկասյան երկաթուղի» փակ բաժնետիրական ընկերության աշխատակիցներ, Երևանի արտակարգ իրավիճակների մշտական գործող և տարհանման հանձնաժողովները, ինչպես նաև ՄԱԿ-ի աղետների կառավարման թիմը։

Ըստ կառավարման մակարդակի` ուսումնավարժությունը երկաստիճան է։ Այն ընդգրկում է ՀՀ արտակարգ իրավիճակների պետական հանձնաժողովը, որը տեղակայված է ՀՀ ԱԻՆ ճգնաժամային կառավարման ակադեմիայի շենքում, իսկ Երևանի արտակարգ իրավիճակների մշտական գործող ու տարհանման հանձնաժողովները` Երևանի քաղաքապետարանում։

Ուսումնավարժության հիմնական նպատակներն են`

– ստուգել և կատարելագործել ՀՀ ԱԻ պետական և Երևանի ԱԻ մշտական գործող ու տարհանման հանձնաժողովների հմտությունները և ունակությունները.

– ստուգել արտակարգ իրավիճակներում արձագանքող ուժերի և միջոցների պատրաստականությունը` փրկարարական և անհետաձգելի վթարավերականգնողական աշխատանքների իրականացման ուղղությամբ.

– կատարելագործել կառավարման մարմինների և արձագանքող ուժերի փոխգործակցությունը.

– ստուգել ՀՀ ԱԻՆ և Ճապոնիայի զարգացման միջազգային համագործակցության գործակալության (JICA) համատեղ մշակած Երևանի աղետի կառավարման պլանը։

Մտահղացման համաձայն` նոյեմբերի 30-ին, ժամը 06.37-ին ՀՀ Կոտայքի մարզում տեղի է ունեցել 7.2 մագնիտուդով երկրաշարժ, որի հիպոկենտրոնը գտնվում է 10 կմ խորության վրա, էպիկենտրոնը` Գառնի համայնքից 8 կմ հյուսիս-արևելք:

Ավերվել են հազարավոր շինություններ, կան մարդկային զոհեր: Առավել ծանր իրավիճակ է ստեղծվել Երևանում՝ հատկապես Ավան, Նոր Նորք և Արաբկիր վարչական շրջաններում: Ըստ կանխատեսումների կան բազմաթիվ զոհեր և վիրավորներ:

Շարքից դուրս են եկել Երևանի ջրամատակարարման և ջրահեռացման համակարգերը: Բազմաթիվ վթարներ են տեղի ունեցել կոմունալ ցանցերում` գազամատակարարման, էլեկտրամատակարարման համակարգերում և տրանսպորտային հաղորդակցության ուղիներում: Առաջացել են հրդեհների բազմաթիվ օջախներ, վնասվել են հիվանդանոցները և կենսաապահովման կազմակերպությունները: Հազարավոր մարդիկ մնացել են անօթևան: Նրանք փորձում են փլատակներից դուրս բերել իրենց տուժած հարազատներին` աշխատելով ձեռքով և ձեռքի տակ եղած գործիքներով:

Երկրաշարժի հետևանքով մասնակի փլվել են Երևանի քաղաքապետարանի, ՀՀ արտաքին գործերի նախարարության վարչական շենքերը: Վնասվել է «Զվարթնոց» միջազգային օդանավակայանի վարչական շենքը և թռիչքուղին:

ՀՀ կառավարությունն օգնության խնդրանքով դիմել է միջազգային հանրությանը:

Ուսումնավարժության առաջին (տեսական) փուլում իրականացվել է մասնակիցների ազդարարում և հավաք։ Ուսումնավարժության ղեկավարման շտաբի պետը զեկուցում է ստեղծված իրավիճակի մասին:

Ուսումնավարժության ղեկավարը խնդիր է դնում մասնակիցների առաջ՝ երկրաշարժի գոտում իրավիճակի բացահայտման և բնակչության պաշտպանության միջոցառումների կազմակերպման ուղղությամբ:

Արտակարգ իրավիճակների պետական հանձնաժողովը հետախուզության տվյալների հիման վրա գնահատում է ստեղծված իրավիճակը։ Գործարկվում են ուժեղ երկրաշարժի դեպքում գործողությունների բոլոր մակարդակի պլանները:

Երևանի արտակարգ իրավիճակների մշտական գործող հանձնաժողովը իրականացնում է տեղեկատվության հավաք երկրաշարժի գոտուց, գնահատում իրավիճակը և ամփոփում առաջարկությունները` բնակչության պաշտպանության վերաբերյալ որոշումներ ընդունելու համար:

Բնակչությանը լրատվամիջոցների օգնությամբ պարբերաբար տրվում է ստեղծված իրավիճակի և իրականացվող աշխատանքների մասին տեղեկատվություն:

Հանձնաժողովներն ամփոփում են «աղետի գոտուց» ստացված տեղեկություններն ու առաջարկություններ ներկայացնում փրկարարական աշխատանքների կազմակերպման վերաբերյալ համապատասխան որոշումներ կայացնելու համար։

Ուսումնավարժության երկրորդ (գործնական) փուլում իրականացվում են փրկարարական աշխատանքներ։

Ըստ սցենարի` Երևանի կայարանամերձ հրապարակում գտնվող կիսակառույց հյուրանոցային համալիրի շենքում տեղի է ունեցել փլուզում, փլատակներում են մնացել մարդիկ և անհրաժեշտ է շենքի վերին հարկերից տարհանել մարդկանց: Շենքում բռնկվել է հրդեհ: Նույն հրապարակի ոստիկանության նախկին հենակետի մոտ վթարի է ենթարկվել ամոնիակ տեղափոխող ավտոգլանատակառ, ինչի հետևանքով մթնոլորտ է արտանետվել 3 տոննա ամոնիակ:

Իրականացվում են փրկարարական, անհետաձգելի վթարավերականգնողական աշխատանքներ: Տուժած բնակչությունը տարհանվում է անվտանգ տարածք: Վիրավորներին ցուցաբերվում է առաջին բուժօգնություն։

Ուսումնավարժության գործնական փուլին ներկա կգտնվի ԱԻ նախարար Ա. Երիցյանը պաշտոնատար այլ անձանց հետ։

 
Դիտել են 53 անգամ.
Հարգելի՛ ընթերցողներ, ստորև կարող եք գրել մեկնաբանություններ` օգտագործելով Ձեր ֆեյսբուքյան հաշիվը: Խնդրում ենք հաշվի առնել այս կանոները՝ արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Կջնջվեն բոլոր այն մեկնաբանությունները որոնք կխախտեն վերոնշված կանոնները: Մաղթում ենք հաճելի քննարկումներ:
loading...

Համանման նյութեր:

 

Կայքում կարող են լինել նյութեր որոնց տարիքային սահամանափակումն է (18+) - See more at: http://aysor.info/am/#sthash.5iXrFpT3.dpuf

Մեջբերումներ անելիս հղումը Aysor.info-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Aysor.info-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում

Արխիվ

Հետևեք մեզ նաև

Կապ մեզ հետ

Մեր կոնտակները

Հեռ.      

Skype   aysor.info

Էլ.փոստ       info@aysor.info